Que cal é a maior tentación dunha persoa que se dedica á
investigación histórica? Pois caer na historia contrafactual. Deixarse seducir
polo “que pasaría se...”. Para nos curarmos deste mal están as novelas, os
escritores de ficción non están sometidos a regras estritas e poden xogar cos
feitos históricos (dentro duns límites, claro). Por iso traio a este blogue
dúas novelas semellantes, ambas xogan con personaxes históricos moi coñecidos,
sacándoos do seu ambiente e levándoos a mundos que, a priori, lles son alleos. A
ver se gostades das propostas.
A primeira novela é Ha vuelto (Seix Barral, 2013), do
escritor alemán Timur Vermer. O argumento é simple: verán de 2011, Adolf Hitler
esperta nunha leira en Berlín, e así comeza todo (outra vez). Tras moitas
ocorrencias, Hitler vese na obriga de traballar para sobrevivir; mais, en que
podería ocuparse? Pois de imitador del mesmo na televisión. O tremendo suceso
do seu programa fai que os partidos políticos alemán queiran gañarse a este
humorista para recadar votos e, todo volta comezar? Baseada neste libro –de gran
éxito na Alemaña– en 2015 realizouse unha película.
A segunda novela é La muerte de Napoleón (Acantilado,
2018), de Simon Leys, alcume literario do escritor belga Pierre Ryckmans. Credes
que Napoleón morreu na illa de Santa Helena? Pois non. Despois de ser
substituído por outra persoa, e logo dunha longa travesía por mar, Napoleón
volve a Europa. Visita Waterloo, que atopa convertido nunha atracción
turística, onde case nada do que contan os guías é verdade. Regresa a Francia.
Para que? Para rematar de vendedor de melóns e sandías en París. Non todo vai
ser heroico e imperial.